धादिङ, साउन २९।
नीलकण्ठ नगरपालिका–१४ स्थित धुवाकोट गुठमा रहेको भंगेरी युवा क्लबको खेलमैदानमा फुटबल मैदान सुरक्षा जाली (Chain-Link Fence) निर्माण कार्य सम्पन्न भएको छ।
वडा कार्यालयबाट विनियोजित रु. ३,००,००० (तीन लाख रुपैयाँ) को बजेटमा निर्माण गरिएको उक्त सुरक्षा जालीले खेलाडीहरूको सुरक्षा, खेलमैदानको संरक्षण तथा खेलकुद गतिविधिलाई थप व्यवस्थित र सुरक्षित बनाउन सहयोग पुग्ने विश्वास गरिएको क्लबले जनाएको छ।
क्लबका अनुसार, स्थानीय खेल पूर्वाधारको विकास र संरक्षणलाई प्राथमिकतामा राख्दै सुरक्षा जाली निर्माण गरिएको हो। यसबाट खेलाडी तथा दर्शकको सुरक्षासँगै खेलमैदानको दीर्घकालीन संरक्षणमा समेत सकारात्मक प्रभाव पर्ने अपेक्षा गरिएको छ।
भंगेरी युवा क्लबले योजना कार्यान्वयनका लागि बजेट विनियोजन गर्ने वडा कार्यालयप्रति हार्दिक आभार व्यक्त गरेको छ। साथै, निर्माण कार्य सफल बनाउन प्रत्यक्ष तथा अप्रत्यक्ष रूपमा सहयोग, समन्वय तथा श्रमदान गर्ने सम्पूर्ण स्थानीयवासी, शुभेच्छुक र सरोकारवालाप्रति कृतज्ञता व्यक्त गरेको छ।
क्लबले आगामी दिनमा पनि स्थानीय समुदायसँगको सहकार्यलाई थप सुदृढ बनाउँदै गाउँ तथा खेलकुद विकासका विभिन्न कार्यक्रमलाई निरन्तरता दिने प्रतिबद्धता जनाएको छ।
"सामूहिक प्रयास, दृढ संकल्प र एकताबाट नै समृद्ध समाज तथा उज्ज्वल भविष्य निर्माण सम्भव हुन्छ।"